Aðeins laust í 5k – uppselt í 29k og 10k
Uppselt í lengri vegalengdir Garmin Eldslóðarinnar – aðeins sæti laus í 5k
Garmin Eldslóðin, eitt vinsælasta utanvegahlaup ársins, fer fram næstkomandi laugardag 13. september í fallegu umhverfi Vífilsstaða og Heiðmerkur. Hlaupinu hefur verið líkt við lokahnykk sumarsins hjá hlaupurum og er orðið árviss viðburður í íslenskri hlaupamenningu.
Þátttakan er frábær þetta árið og er nú uppselt í bæði 29 km og 10 km brautirnar. Enn er þó hægt að tryggja sér sæti í nýrri 5 km braut sem kynnt var til leiks í fyrsta sinn í ár.
„Við finnum að áhuginn á utanvegahlaupum fer vaxandi með hverju ári og viljum mæta fjölbreyttum hópi hlaupara. Nýja 5 km brautin er frábært tækifæri fyrir þau sem eru að stíga sín fyrstu skref í utanvegahlaupum eða vilja einfaldlega taka þátt í góðri stemningu,“ segir Einar Bárðarson, einn skipuleggjenda.
Keppendur fá að njóta einstakrar náttúru í hlaupinu, aðeins steinsnar frá borginni. Viðburðurinn hefur skapað sér sérstöðu með líflegri stemningu á rás- og endamarki. Allir keppendur fá medalíu og verðlaun eru veitt fyrir efstu sæti í hverjum flokki. Að loknu hlaupi er öllum boðið í matarvagnaveislu og eru fjölskyldur og vinir hlaupara hvött til að mæta á staðinn.
Garmin Eldslóðin veitir einnig stig samkvæmt alþjóðlegum ITRA-staðli, sem styrkir stöðu hlaupsins á alþjóðavettvangi.
